Hanna Paulsberg – Belonging

Belonging 50 år – Keith Jarrett sine klassikarar på ny!

I 1974 spelte Keith Jarrett, Jan Garbarek, Palle Danielsson og Jon Christensen inn det ikoniske albumet Belonging i Arne Bendiksen Studio i Oslo. 50 år seinare hyllar fire av Noreg sine aller fremste jazzmusikarar denne klassikaren!

Prosjektet starta som eit storslått bestillingsverk til Oslo Jazzfestival i 2024. Konserten vart ein ellevill suksess med smekkfulle hus og fantastiske tilbakemeldingar frå både publikum og meldarar. Då Jazz i Norge meldte frå konserten, spurde dei like godt: «Trenger man Garbarek når man har Paulsberg?»

Nå rullar suksessen vidare, og kvartetten kjem til oss med ein utvida konsert! Dei spiler heile Belonging-plata frå start til slutt – inkludert perler som «Long as You Know You’re Living Yours», «Blossom» og «The Windup» – i tillegg til andre udødelege favorittar frå Keith Jarrett sin katalog.

Gjer deg klar for ein kveld fylt med det opne, lyriske og melodiske universa som definerte den nordiske ECM-lyden på 70-talet, levert i spilllevande og personlege tolkingar frå eit sylskarpt lag!

Medverkande:

• Hanna Paulsberg – saksofon
• Vigleik Storaas – piano
• Trygve Fiske – kontrabass
• Hans Hulbækmo – trommer

Tjuvlytt og les meir

• 🎧 Høyr opptak: Høyr opptaket frå konserten i Aulaen under Oslojazz hos NRK Radio
• 📰 Anmelding: Les den strålande omtalen hos Jazz i Norge